سهنديم / استاد شهريار

شاه داغيم ،

چال پاپاغيم ،

ائل داياغيم ،

انلي سهنديم،

باشي طوفانلي سهنديم

حجم فايل: 3.6 مگابايت

بصورت فلش : دانلود

———

فايل صوتي: دانلود

سهنديم!

شاه داغيم، چال پاپاغيم، ائل داياغيم، شانلي سهنديم،

باشي طوفانلي سهنديم

باشدا حيدر بابا تك قارلاقيروولارقاريشيب سان،

سون ايپك تئللي بولود لارلا افقده ساريشيب سان،

ساواشار كن باريشيب سان

گويدن الهام آلالي سرري سماواته دئيه رسن،

هله آغ كوركي بورو، يازداياشيل دون داگئيه رسن،

قورادان حالوايئيه رسن

دوشلرونده صونالار سينه سي تك شوخ ممه لرده،

نه شيرين چشمه لرين وار.

اوياشيل تئللري، يئل هورمه ده آينالي سحرده،

عشوه لي ائشمه لرين وار.

قوي ياغيش ياغسادا ياغسين،

سئل اولوب آخسادا آخسين،

يانلاروندا دره لروار.

قوي قلمقاشلارين اوچسون قره لرله، هامي باخسين،

دوشلرونده هئره لروار،

او، اتك لرده نه قيزلار ياناغي لاله لرين وار،

قوزولار اوتلاياراق، ني ده نه خوش ناله لرين وار،

آي كيمي هاله لرين وار.

گول چيچكدن بزه ننده، نه گلين لر كيمي نازين،

يئل اسنده اوسولاردا نه ده رين رازنيازين،

اوينايار گوللو قوتازين

تيتره يير ساز تئلي تك شاخه لرين چايدا چمنده،

يئل او تئللرده گزه نده، نه كور اوغلي چالي سازين،

اورده گون خلوت ائديب گولده پري لرله چيمنده،

قولقاناددان اونا آغ حوله آچار غمزه لي قازين.

قيش گئدر،قوي گله يازين

هله نوروز گولي وار، قارچيچگين وار، گله جكلر

سئلياغشيدا يويونار كن ده گونش له گوله جكلر،

اوزلرين تئزسيله جكلر.

قيشدا كهليك هوسي له،چوله قاچديقدا جوانلار.

قاردا قاققيلدا ياراق نازلي قلمقاشلارين اولسون!

ياز، اودوشلرده ناهار منده سين آچديقدا چوبانلار،

بوللي، سودلي سورولر، دادلي قاووتماشلارين اولسون!

آد آليب سندن او شاعر كي، سن اوندان آد آلارسان،

اونا هرداد وئره سن، يوز اومقابل داد آلارسان

تاريدان هرزاد آلارسان

آداش اولدوقدا، سن اونلا، داها آرتين او جالارسان،

باش اوجالديقدا دماوند داغيندان باج آلارسان،

شئر اليندن تاج آلارسان!

اودا، شعرين، ادبين شاه داغيدير، شانلي سهندي،

اودا، سن تك آتار اولدوزلا را شعريله، كمندي،

اودا، سيمرغ دن آلماقدادي فندي،

شعر يازاندا قلميندن باخاسان در سپه لندي،

سانيك اولدوزلار الندي،

سوز دئينده گوروسن قاتدي گولي، پسته ني، قندي،

ياشاسين شاعر افندي!

او نه شاعر، كي داغين و صفينه مصداق اوني گوردوم،

من سنون تك اوجاليق مشقينه مشاق اوني گوردوم،

عشقه، عشق اهلينه مشتاق اوني گوردوم.

او نه شاعر، كي خيال مركبينه شو و شيغا ياندا،

او نهنگ آت آياغين توزلي بولودلاردا قوياندا،

لوله لنمكده دي يئرگوي، نئجه طومار سارياندا،

گوره جكسن اوزماندا:

نه زمان وارسا، مكان وارساكسيب بيچدي بير آندا،

كئچه جكلر، گله جكلر نه بوياندا. نه اوياندا،

نه بيليم قالدي هاياندا؟

باخ نه حرمت وار اونون ئوزدئميشي توك پاپاغيندا،

شعرينين تاجي اگيلميش باشي دورموش قاباغيندا،

باشينا ساوريلان اينجي، چاريق اولموش آياغيندا،

وحي دير شعري، ملك لر دي پيچيلدير قولاغيندا.

شهدي واربال دوداغيندا.

اودا داغلاركيمي شانينده نه يازسام يارا شانديز.

اودا ظالم قوپاران قارلا، كولك له دور و شاندير.

قودوزا، ظالمه قارشي سينه گرميش، وورو شاندير.

قودوزون كور كونه، ظالم بيره لر تك دارا شاندير.

آمما و جهينده فقير خلقي اگيلميش سورو شاندير.

قارا ملتده هنر بولسا، هنرله آرا شاندير.

قارالارلا قاريشاندير،

ساريشاندير

گئجه حققين گوزودير، طور توره تميش اوجاغيندا،

اري ييب ياغ تك اور كلردي يانيرلار چيراغيندا،

مي، محبتدن ايچيب لالهبيتيبدير ياناغيندا،

اوبير اوقلان كي، پري لر سوايچر لر چاناغيندا،

اينچي قاينار بولاغيندا،

طبعي بير سئوگلي بولبول كي، اوخور گول بوداغيندا،

ساري سونبول قوجاغيندا،

سولار افسانه دي سويله ر اونون افسونلي باغيندا،

سحرين چنلي چاغيندا.

شاعرين ذوقي، نه افسونلي، نه افسانه لي باغلار،

آي نه باغلار، كي «الف ليلي» ده افسانه ده باغلار.

اود ياخيب، داغلاري داغلار،

گول گولر سه بولاغ آغلار.

شاعرين عالمي ئولمز، اونا عالمده زوال يوخ،

آرزيلار اوردانه خاطر ليه امكاندي، محال يوخ،

باغ جنت كيمي اوردا «بو حرام دير، بو حلال» يوخ

او محبتده ملال يوخ،

اوردا حال دير، داها قال يوخ!

گئجه لر اورداگومو شدندي، قيزيلدان نه گونوزلر،

نه زمر كيمي باغلارد، نه مرمر كيمي دوزلر،

نه ساري تئللي اينكلر، نه آلاگوزلو ئو كوزلر،

آي نئجه، آي كيمي اوزلر؟!

گول آغاجلاري نه طاوس كيمي چترين آچيب الوان

«حلله» كرواننيدي چوللر، بزه نر سورسه بوكروان،

دوه كرواني دا داغلار، يوكي اطلس دي بو حيوان،

صابرين شهرينه دوغرو، قاطاري چكمه ده سروان،

او خياليمدا كي شيروان!

اوردا قاردا ياغار، آمما داها گوللر سولا بيلمز،

بو طبيعت، او طراوتده محال دير، اولابيلمز،

عومر پيمانه سي اوردا دو لا بيلمز

او افقلرده باخارسان نه ده نيزلر، نه بوغازلار،

نه پريلر كيمي قوشلار قونوب، اوچماقدا نه قازلار

گولده چيممكده نه قيزلار

باليغ اولدوز كيمي گوللرده، ده نيزلرده پاريلدار،

آبشار مرواري سين سئل كيمي تو كدو كده خاريلدار،

يئل كوشولدار، سوشاريلدار

قصر لر واردي قزيلدان، قالالار واردي عقيق دن،

«زافائيل» تابلوسي تك، صحنه لري عهد عتيق دن،‌

دويماسان كوهنه رفيقدن.

جنتين باغلاري تك باغلاري نين حور و قصوري

دوزولوب غرفه ده، ايواندا، جواهر كيمي حوري،

الده حوري لري نين جام بلوري،

تونگونون گول كيمي (صهباي طهوري)

نه ماراقلاركي، آييق گوزلره رويادي دئييرسن،

نه شافاقلار كي ده رين باخمادا دريادي دئييرسن،

اويدوران جنت ماوا دي دئييرسن!

زهره نين قصري بريليان حصاري اينجي دي، ياقوت،

قصر جادوي، مهندسلري هاروت ايله، ماروت،

اوردا «ماني» دايانيب قالميش اوصورتلره مبهوت،

قاپي قوللوقچي سي هاروت!

اوردا شعرين، موزيكون منبعي سرچشمه دي قاينار،

نه پريلر كيمي فواره دنافشان اولوب اوينار،

شاعر آنجاق اونو آنلار!

دولو مهتاب كيمي استخردي فواره لر ايله،

ملكه اوردا چيمير، آي كيمي هپاره لر ايله،

گوللو گوشواره لر ايله.

شعر و موسيقي شاباش اولمادا، افشاندي پريشان،

سانكي آغ شاهي دير اولماقدا گلين باشينا افشان،

نه گلين لر كي نه انليك اوزه سورترله، نه كيرشان

ياخا، نه تولكي، نه دووشان!

آغ پري لر، ساري كوينكلي بولود لاردان انيرلر،

سود گولونده ملكه ايله چيمير كن سئوينيرلر،

سئوينيرلر، ئويونورلر.

قووزاياندا هره الده دولو بيرجام آپاريرلار،

سانكي چنگي لره، شاعر لره الهام آپاريرلار

دربا قيزلارينا پيغام آپاريرلار.

ده نيزين ئورتوگي ماوي، افقين سقفي سماوي،

آينادير، هر نه باخيرسان: يئر اولوب گوي له مساوي،

غرق اونون شعرينه راوي.

غرفه لر، آي بولود آلتيندا اولار تك گورونورلر،

گوزآچيب يومما، چيراغلار كيمي يانديقدا سونورلر،

صحنه لر چرخ فلك تك بورولوب، گاهدا چونورلر،

كولگه ليكلر سورونورلر.

زهره ايواندا الهه شينيلينده گورونر كن،

باخاسان حافظي ده اوردا جلالتله گوررسن،

نه سئورسن.

گاه گورن حافظ شيراز ايله ايواندا دوروبلار،

گاه گورن اورتادا شطرنج قورار كن اوتوروبلار،

كاه گورن سازيله، آْوازيله اگلنجه قوروبلار،

سانكي ساغر ده ووروبلار.

خواجه الحان او خوياندا، هامي ايشدن دايانيرلار،

اونوالرله پري لر گاه اويوب، گاه اويانيرلار،

لاله لر شعله سي، الوان شوشه رنگي بويانيرلار،

نه خومار گوزله يانيرلار.

قانادايستير بوفضا، قوي قالاطر لانلي سهنديم،

ائشيت ئوز قصه مي، دستانيمي، دستانلي سهنديم:

«سنتي«حيدربابا» اول نعره لريله چاغيراندا،

اوسفيل دارداقالان، تولكو قووان شئر باغيراندا

شيطانين شيللاغا قالخان قاطيري نوخدا قيراندا،

«دده قورقود» سسين آلديم، دئديم: «آرخامدي» اينانديم.

آرخا دورديقدا «سهنديم» ساوالان تك ها والانديم،

سئله قارشي قووالانديم.

«جوشغونون» داقاني داشدي، منه بير هايلي سس اولدي،

هر سسيز بير نفس اولدي.

باكي داغلاري دا، هاي وئردي سسه، قيها اوجالدي،

اوتايين نعره لري سانكي بوتايدان دا باج آلدي،

قورد آجالديقدا قوجالدي

«راحمين» نعره سي قووزاندي دئيه ن توپلار آتيلدي،

سئل گليب نهره قاتيلدي

«رستمين» توپلاري سسلندي دئيه ن بوملار آچيلدي،

بيزه گولغنچه ساچيلدي.

«قورخما گلديمدئيه، سسلرده منه جان دئدي قارداش،

منه جانجان دئيه رك ،‌ دشمنه قانقان دئدي قارداش.

منه سلطان دئدي قارداش

من ده جانيم چغيريب : جان سنه قربان دئدي قارداش

ياشااوغلانسيزه داغدان دلي جيران دئدي قارداش

ائل سيزه قافلان دئدي قارداش!

داغ سيزه اصلان دئدي قارداش!

داغلي حيدر بابانين آرخاسي هر يئرده داغ اولدي،

داغاداغلار داياغ اولدي.

آرازيم آينا چيراغ قويمادا، آيدين شافاغ اولدي،

اوتايين نغمه سي قووزاندي،‌ اوركلر قولاغ اولدي،

يئنه قارداش دئيه رك قاچمادا باشلار آياغ اولدي،

قاچديق، اوزلشديك آرازدا، يئنه گوزلر بولاغ اولدي،

يئنه غملر قالاغ اولدي

يئنه قارداش ساياغي سوزلريميز بير ساياغ اولدي،

وصل ايگين آلمادا، ال چاتمادي، عشقيم داماغ اولدي،

هله ليك غم سارالار كن قارالار دوندي آغ اولدي،

آرازين سود گولي داشدي، قاياليقلاردا باغ اولدي،

ساري سونبوللره زلف ايچره اوراخلار داراغ اولدي،

يونجاليقلار يئنه بيلدير چينه ياييازياتاغ اولدي.

گوزده ياشلار چيراغ اولدي،

لاله بيتدي ياناغ اولدي،

غنچه گولدي، دو داغ اولدي،

نه صول اولدي، نه ساغ اولدي!

ائليمي آرخامي گورديكده ظاليم اووچوقيسيلدي،

سئل كيمي ظلمي باسيلدي، زينه آخ اولدي، كسيلدي،

گول گوزوندن ياشي سيلندي

تور قوران اووچي آتين قوومادا سيندي گئري قالدي،

ئوزي گئتدي، توري قالدي

آمما حيدربابادا بيلدي كي بيز تك هامي داغلار،

باغلانيب قولقولا زنجيرده، بولودولار او دير آغلار،

نه بيليم، بلكه طبيعت ئوزي نامرده گون آغلار،

اگري يوللاري آچار كن، دوز اولادن قوللاري باغلار،

صاف اولان سينه ني داغلار!

داغلارين هر نه قوچي، طرلاني، جئيراني، مارالي،

هامي دوشگون، هامي پوزغون، سينه لر داغلي، يارالي،

گول آچان يئرده سارالي!

آمما ظن ائتمه كي داغلار يئنه قالخان اولا جاقدير،

محشر اولماقادادي بونلار، داها و ولقان اولا جاقدير،

ظلم دنياسي يانار كن ده تيليت قان اولا جاقدير!

واي…! نه طوفان اولا جاقدير!

دئدين: آذر ائلي نين، ببر يارالي نيسگيلي يم من،

نيسگيل اولسام دا، گولوم! بير ابدي سويگولي يم من،

ياد مني آتسادا، ئوز گلشنمين بولبولي يم من،

ائليمين فار سيجادا درديني سويله ر ديلي يم من،

حققه دوغرو نه قارانليق ايسه، ائل مشعلي يم من،

ابديت گولي يم من!

نيسگيل اول چرچيه قالسين كي، جوهر نه دي قانمير،

مدنيت ده بين ايلير بدويت، بير اوصانمير،

گون گئدير، آزقالا باتسين، گئجه سيندن بير اويانمير،

بير ئوز احوالينا يانمير!

آتار انسانليغي، آمما يالان انسابي آتانماز،

فتنه قووزانماسا بير گون گئجه آسوده يانانماز،

باشي باشلاره قاتانماز!

آمما مندن ساري، سن آرخايين اول، شانلي سهنديم،

ده لي جيرانلي سهنديم

من داها عرش علاكولگه سي تك باشدا تاجيم وار،

الده موسي كيمي فرعونه غنيم، بير آغاجيم وار،

حرجيم يوخ، فرجيم وار.

من علي اوغلويام، آزاده لرين مردي، مرادي،

او ، قارانليقلارا مشعل،

او، ايشيقليقلارا هادي،

حققه، ايمانه منادي!

باشدا سينماز سپريم، الده كوتلمز قلجيم وار!

منبع شعر

4 پاسخ to “سهنديم / استاد شهريار”

  1. مجتبی Says:

    بسیار زیبا بود. . . 🙂

  2. سهند Says:

    chox guzel,harika
    ellerize saghlix

  3. وحید آتش بار Says:

    چوخ گوزل چوخ دویغولو تانری یاردیمجین اولسون

  4. الشئن Says:

    چوخ ياشا تورك اغلي


پاسخی بگذارید

در پایین مشخصات خود را پر کنید یا برای ورود روی شمایل‌ها کلیک نمایید:

نشان‌وارهٔ وردپرس.کام

شما در حال بیان دیدگاه با حساب کاربری WordPress.com خود هستید. بیرون رفتن / تغییر دادن )

تصویر توییتر

شما در حال بیان دیدگاه با حساب کاربری Twitter خود هستید. بیرون رفتن / تغییر دادن )

عکس فیسبوک

شما در حال بیان دیدگاه با حساب کاربری Facebook خود هستید. بیرون رفتن / تغییر دادن )

عکس گوگل+

شما در حال بیان دیدگاه با حساب کاربری Google+ خود هستید. بیرون رفتن / تغییر دادن )

درحال اتصال به %s

%d وب‌نوشت‌نویس این را دوست دارند: